Búlúlala Öldin hans Steins er nýtt leikverk fyrir leikara og tónlistarmann sem Kómedíuleikhúsið setur á svið til að minnast aldarafmælis Steins Steinars. Leikurinn verður frumsýndur fimmtudaginn 8. maí í Tjöruhúsinu á Ísafirði. Alls verða þrjár sýningar á Ísafirði eftir það verður flakkað um Vestfirðina og sýnt á Flateyri, á Bíldudal, í Bolungarvík og í Haukadal í Dýrafirði. Einnig hefur leikhúsinu verið boðið að sýna leikinn á sérstakri Steins Steinars hátíð á Snjáfjallasetri 21. júní næstkomandi.
Í þessum nýja ljóðaleik, Búlúlala Öldin hans Steins, eru flutt mörg af þekktustu ljóðum Steins í bland við minna þekkt kvæði. Leikurinn er sambland leikara og tónlistarmanns og er í raun framhald af samstarfi þeirra Elfars Loga Hannessonar, leikara, og Þrastar Jóhannessonar, tónlistarmanns, sem hófst í fyrra með ljóðaleiknum Ég bið að heilsa. Í þessum nýja ljóðaleik flytur Elfar Logi ljóð Steins í leik og tali en Þröstur flytur frumsamin lög við ljóð Steins Steinars. Til samstarfs hafa þeir fengið þriðja listamanninn sem er Marsibil G. Kristjánsdóttir sem hefur gert portretmynd af skáldinu sem gegnir hlutverki leikmyndar í sýningunni. Einsog margir vita hefur Steinn verið vinsælt myndefni margra myndlistarmanna í gegnum árin og er gaman að fá nú á aldarafmæli Steins nýja mynd af skáldinu eftir vestfirskan listamann. Meðal ljóða sem koma við sögu í Búlúlala Öldin hans Steins má nefna Að frelsa heiminn, Barn, Miðvikudagur, Söngvarinn, Tindátarnir, Þjóðin og ég og að sjálfsögðu ljóðið Búlúlala sem leikurinn er nefndur eftir.
Steinn Steinarr er án efa eitt þekktasta og jafnframt umdeildasta ljóðskáld síðustu aldar. Hann hét réttu nafni Aðalsteinn Kristmundsson og fæddist 13. október árið 1908 á Laugalandi í Nauteyrarhreppi. Þegar Steinn kom fram á ritvöllinn hóf hann þegar að brjóta reglur sem ríkt höfðu í skáldskap hér á landi um langa hríð og varð umdeildur fyrir vikið. Harðorðar greinar birtust í blöðum um Stein og margir sögðu skáldskap hans vera vitleysu eina. Aðrir á hinn bóginn fögnuðu framlagi hans og sögðu að loksins væri komið fram skáld sem þyrði að breyta staðnaðri, íslenskri ljóðlist. Ljóð Steins eru þjóðinni mjög kær og við mörg þeirra hafa verið samin lög sem hafa ekki síður notið vinsælda. Steinn Steinarr andaðist 25. maí árið 1958, rétt tæplega fimmtíu ára að aldri.
Kómedíuleikhúsið á Ísafirði var stofnað árið 1997 og er fyrsta og eina atvinnuleikhúsið á Vestfjörðum. Meðal leikverka sem leikhúsið hefur sett á svið má nefna Muggur, 2002, Steinn Steinarr, 2003, Gísli Súrsson, 2005, Dimmalimm, 2006, og Jólasveinar Grýlusynir, 2007. Kómedíuleikhúsið stendur einnig fyrir leiklistarhátíðinni Act alone sem er eina árlega leiklistarhátíðin á Íslandi. Hátíðin er helguð einleikjum og hefur vakið mikla athygli bæði hér heima og erlendis. Til gamans má geta þess að fyrr á árinu fékk Act alone Menningarverðlaun DV. Fimmta Act alone hátíðin verður haldin á Ísafirði 2. 6. júlí næstkomandi og er aðgangur að hátíðinni ókeypis. Nánari upplýsingar um Act alone er á heimasíðu hátíðarinnar www.actalone.net Kómedíuleikhúsið er einnig á netinu og er slóðin www.komedia.is
