Í febrúar og mars stendur Þjóðleikhúsið fyrir námskeiði fyrir almenning í tengslum við sýningu leikhússins á Pétri Gaut eftir Henrik Ibsen. Pétur Gautur verður opnunarsýning Kassans, sem er nýtt leiksvið í Þjóðleikhúsinu. Á námskeiðinu verður lögð áhersla á að opna þátttakendum heim leikhússins og gefa þeim innsýn inn í aðferðir þess.
Pétur Gautur er eitt af meistarverkum Henriks Ibsens, snilldarlegur ljóðleikur sem aflaði skáldinu heimsfrægðar. Verkið kom fyrst út á bók árið 1867 en tæpum áratug síðar var það frumflutt og hefur reglulega verið sett upp í frægum uppsetningum í helstu leikhúsum heims síðan þá, enda hefur hin margbrota titilpersóna verksins og knýjandi spurningar um það sem skiptir máli í lífinu og kjarna mannsins heltekið jafnt leikhúslistafólk sem áhorfendur í gegnum tíðina. Mannlegt innsæi höfundarins nýtur sín hér til fulls og ímyndunarafl og hugmyndaauðgi hans fara á óviðjafnanlegt flug, í verki sem er leiftrandi af húmor.
Leikstjóri sýningarinnar verður Baltasar Kormákur, sem hefur vakið athygli fyrir frumlegar og myndrænar leiksýningar, bæði á klassískum verkum á borð við Hamlet og Draum á Jónsmessunótt, sem og nýrri verkum. Má þar nefna nýlegustu uppsetningu hans í Þjóðleikhúsinu á Þetta er allt að koma, sem hlaut Grímuna-Íslensku leiklistarverðlaunin 2003. Gretar Reynisson, sem gerir leikmynd sýningarinnar á Pétri Gaut, hlaut jafnframt Grímuna fyrir Þetta er allt að koma. Í titilhlutverkinu verður Björn Hlynur Haraldsson, ungur leikari sem hefur meðal annars vakið athygli fyrir leik sinn með Vesturporti, en þreytir nú frumraun sína í Þjóðleikhúsinu. Í þessari nýju sýningu verður sjónum beint að Pétri Gaut í nútímanum og því hvernig verkið getur talað til okkar í dag. Kassinn er nýtt leiksvið í Þjóðleikhúsinu við Lindargötu, í sama húsi og Litla sviðið var áður, sem býður upp á margbreytilega og spennandi möguleika í sviðsetningu.
Á námskeiðinu verður fjallað um leikritið Pétur Gaut, en þetta margræða verk hefur í gegnum tíðina vakið upp ótal spurningar. Þátttakendur fá til lestrar nýja þýðingu Karls Ágúst Úlfssonar á verkinu, en það hefur áður komið út í tveimur þýðingum, eftir Einar Benediktsson og Helga Hálfdanarson. Þátttakendum er boðið í heimsókn á æfingu og þeir kynnast innviðum Þjóðleikhússins og starfinu í húsinu. Þeir sjá sýninguna svo fullbúna og námskeiðinu lýkur með umræðum um verkið og sýninguna með þátttöku leikstjóra, listrænna aðstandenda og leikara í sýningunni. Námskeiðið verður haldið í febrúar og mars. Það deilist niður á þrjú þriðjudagskvöld, auk sýningarinnar, en þá geta þátttakendur valið á milli tveggja sýningarkvölda.
Umsjón með námskeiðinu hefur Melkorka Tekla Ólafsdóttir, leiklistarráðunautur Þjóðleikhússins, í samvinnu við fræðsludeild leikhússins. Skráning og nánari upplýsingar hjá fræðsludeild í síma 585 1267, fraedsla@leikhusid.is.
