Áhugaleikhús atvinnumanna sýnir áttunda örverkið af 12 um áráttur, kenndir og kenjar, fimmtudaginn 26. ágúst kl. 12.30 í Útgerð Hugmyndahúss háskólanna. Verkið, sem heitir Örverk um Ágúst eins og hann leggur sig, er sýnt í beinni útsendingu á veraldarvefnum á slóðinni www.herbergi408.is en þar er jafnframt hægt að skoða fyrri verk úr örverkaröðinni. Leikstjóri er Steinun Knútsdóttir.
Örverkin 12 taka á áráttum, kenndum og kenjum sem hafa áhrif á mannlega tilvist í Reykjavík 2010 og eru kennd eftir þeim mánuði sem þau eru flutt í. Viðfang verkanna ræðst af því sem hrærist í samtímanum og hefur áhrif á líf okkar. Leikarar eru Aðalbjörg Árnadóttir, Árni Pétur Guðjónsson, Hannes Óli Ágústsson, Orri Huginn Ágústsson og Sveinn Ólafur Gunnarsson.
Áhugaleikhús atvinnumanna er hópur atvinnufólks í sviðslistum sem hefur áhuga á frelsi til óháðrar listsköpunar í leiklist. Leikhúsið lítur á leiksýningar sínar sem vettvang til að velta áleitnum spurningum fyrir sér þó ekki sé langt í kímni og kæruleysi. Markmiðið með starfinu er að að skapa framsækin og áleitin sviðslistaverk sem í eðli sínu eru samtal við áhorfendur og eru óháð markaðsöflum. Leikhúsið vill ekki fara í viðskiptasamband við áhorfendur sína og býður þess vegna áhorfendum í samtal án endurgjalds og þiggur ekki aðgangseyri á sýningar sínar.
Listamenn leikhússins fengu úthlutað listamannalaunum fyrir árið 2010 og eru styrkt af Reykjavíkurborg.
Bein útsending: Hákon Már Oddson ásamt útskriftarnemum Lista og fjölmiðlasviðs Borgarholtsskóla.
{mos_fb_discuss:2}
